tū ki anjān hai is shahar ke ādāb samajh
phuul ro.e to use ḳhanda-e-shādāb samajh
kahīñ aa jaa.e mayassar to muqaddar terā
varna āsūdgī-e-dahr ko nāyāb samajh
hasrat-e-girya meñ jo aag hai ashkoñ meñ nahīñ
ḳhushk āñkhoñ ko merī chashma-e-be-āb samajh
mauj-e-dariyā hī ko āvāra-e-sad-shauq na kah
reg-e-sāhil ko bhī lab-tishna-e-sailāb samajh
ye bhī vā hai kisī mānūs kiran kī ḳhātir
rauzan-e-dar ko bhī ik dīda-e-be-ḳhvāb samajh
ab kise sāhil-e-ummīd se taktā hai ‘farāz’
vo jo ik kashti-e-dil thī use ġharqāb samajh