roz aadhī raat ko
ik tilismī ġhaar ke
ḳhufiya darvāze ke siine meñ janam letī haiñ ġhaibī dhaḌkaneñ
ġhaar kī gahrā.ī meñ
chalte hue sañgīt ke qadmoñ kī chaap
raat kī andhī havā kā haath pakḌe duur tak jaatī hai saath
ek zahrī saañp
khiñch aatā hai sar kī chaah meñ
laakh ḳhatre haiñ zarā sī raah meñ
band darvāze ke paas
narm bhīnī ghaas meñ
baiTh jaatā hai vo kunDlī maar ke
aur apnā phan uThā.e
jhūmtā rahtā hai sar kī taan par
kheltā rahtā hai apnī jaan par
TūTtā hai jis ghaḌī sar kā bahāo
saañp ko aatā hai taao
band darvāze pe ġhussa meñ paTaktā hai vo sar
aur Das letā hai us ko apnā zahrī phan uThā kar
sub.h hone tak to mar jaatā hai darvāza
magar
roz aadhī raat ko