taswir-e-dard

Share on facebook
Facebook
Share on twitter
Twitter
Share on linkedin
LinkedIn

nahīñ minnat-kash-e-tāb-e-shunīdan dāstāñ merī

ḳhamoshī guftugū hai be-zabānī hai zabāñ merī

ye dastūr-e-zabāñ-bandī hai kaisā terī mahfil meñ

yahāñ to baat karne ko tarastī hai zabāñ merī

uThā.e kuchh varaq laale ne kuchh nargis ne kuchh gul ne

chaman meñ har taraf bikhrī huī hai dāstāñ merī

uḌā lī qumriyoñ ne tūtiyoñ ne andalīboñ ne

chaman vāloñ ne mil kar luuT lī tarz-e-fuġhāñ merī

Tapak ai sham.a aañsū ban ke parvāne kī āñkhoñ se

sarāpā dard huuñ hasrat bharī hai dāstāñ merī

ilāhī phir maza kyā hai yahāñ duniyā meñ rahne kā

hayāt-e-jāvedāñ merī na marg-e-nā-gahāñ merī

mirā ronā nahīñ ronā hai ye saare gulistāñ kā

vo gul huuñ maiñ ḳhizāñ har gul kī hai goyā ḳhizāñ merī

darīñ hasrat sarā umrīst afsūn-e-jaras dāram

z faiz-e-dil tapīdan-hā ḳharosh-e-be-nafas dāram

riyāz-e-dahr meñ nā-āshnā-e-bazm-e-ishrat huuñ

ḳhushī rotī hai jis ko maiñ vo mahrūm-e-masarrat huuñ

mirī bigḌī huī taqdīr ko rotī hai goyā.ī

maiñ harf-e-zer-e-lab sharminda-e-gosh-e-samā.at huuñ

pareshāñ huuñ maiñ musht-e-ḳhāk lekin kuchh nahīñ khultā

sikandar huuñ ki ā.īna huuñ yā gard-e-kudūrat huuñ

ye sab kuchh hai magar hastī mirī maqsad hai qudrat kā

sarāpā nuur ho jis kī haqīqat maiñ vo zulmat huuñ

ḳhazīna huuñ chhupāyā mujh ko musht-e-ḳhāk-e-sahrā ne

kisī ko kyā ḳhabar hai maiñ kahāñ huuñ kis kī daulat huuñ

nazar merī nahīñ mamnūn-e-sair-e-arsa-e-hastī

maiñ vo chhoTī sī duniyā huuñ ki aap apnī vilāyat huuñ

na sahbā huuñ na saaqī huuñ na mastī huuñ na paimāna

maiñ is mai-ḳhāna-e-hastī meñ har shai kī haqīqat huuñ

mujhe rāz-e-do-ālam dil kā ā.īna dikhātā hai

vahī kahtā huuñ jo kuchh sāmne āñkhoñ ke aatā hai

atā aisā bayāñ mujh ko huā rañgīñ-bayānoñ meñ

ki bām-e-arsh ke taa.ir haiñ mere ham-zabānoñ meñ

asar ye bhī hai ik mere junūn-e-fitna-sāmāñ kā

mirā ā.īna-e-dil hai qazā ke rāz-dānoñ meñ

rulātā hai tirā nazzāra ai hindostāñ mujh ko

ki ibrat-ḳhez hai terā fasāna sab fasānoñ meñ

diyā ronā mujhe aisā ki sab kuchh de diyā goyā

likhā kalk-e-azal ne mujh ko tere nauha-ḳhvānoñ meñ

nishān-e-barg-e-gul tak bhī na chhoḌ us baaġh meñ gulchīñ

tirī qismat se razm-ārā.iyāñ haiñ bāġhbānoñ meñ

chhupā kar āstīñ meñ bijliyāñ rakkhī haiñ gardūñ ne

anādil baaġh ke ġhāfil na baiTheñ āshiyānoñ meñ

sun ai ġhāfil sadā merī ye aisī chiiz hai jis ko

vazīfa jaan kar paḌhte haiñ taa.ir bostānoñ meñ

vatan kī fikr kar nādāñ musībat aane vaalī hai

tirī barbādiyoñ ke mashvare haiñ āsmānoñ meñ

zarā dekh us ko jo kuchh ho rahā hai hone vaalā hai

dharā kyā hai bhalā ahd-e-kuhan kī dāstānoñ meñ

ye ḳhāmoshī kahāñ tak lazzat-e-fariyād paidā kar

zamīñ par tū ho aur terī sadā ho āsmānoñ meñ

na samjhoge to miT jāoge ai hindostāñ vaalo

tumhārī dāstāñ tak bhī na hogī dāstānoñ meñ

yahī ā.īn-e-qudrat hai yahī uslūb-e-fitrat hai

jo hai rāh-e-amal meñ gām-zan mahbūb-e-fitrat hai

huvaidā aaj apne zaḳhm-e-pinhāñ kar ke chhoḌūñgā

lahū ro ro ke mahfil ko gulistāñ kar ke chhoḌūñgā

jalānā hai mujhe har sham-e-dil ko soz-e-pinhāñ se

tirī tārīk rātoñ meñ charāġhāñ kar ke chhoḌūñgā

magar ġhunchoñ kī sūrat huuñ dil-e-dard-āshnā paidā

chaman meñ musht-e-ḳhāk apnī pareshāñ kar ke chhoḌūñgā

pironā ek hī tasbīh meñ in bikhre dānoñ ko

jo mushkil hai to is mushkil ko āsāñ kar ke chhoḌūñgā

mujhe ai ham-nashīñ rahne de shaġhl-e-sīna-kāvī meñ

ki maiñ dāġh-e-mohabbat ko numāyāñ kar ke chhoḌūñgā

dikhā dūñgā jahāñ ko jo mirī āñkhoñ ne dekhā hai

tujhe bhī sūrat-e-ā.īna hairāñ kar ke chhoḌūñgā

jo hai pardoñ meñ pinhāñ chashm-e-bīnā dekh letī hai

zamāne kī tabī.at kā taqāzā dekh letī hai

kiyā rif.at kī lazzat se na dil ko āshnā tū ne

gizārī umr pastī meñ misāl-e-naqsh-e-pā tū ne

rahā dil-basta-e-mahfil magar apnī nigāhoñ ko

kiyā bairūn-e-mahfil se na hairat-āshnā tū ne

fidā kartā rahā dil ko hasīnoñ kī adāoñ par

magar dekhī na us ā.īne meñ apnī adā tū ne

ta.assub chhoḌ nādāñ dahr ke ā.īna-ḳhāne meñ

ye tasvīreñ haiñ terī jin ko samjhā hai burā tū ne

sarāpā nāla-e-bedād-e-soz-e-zindagī ho jā

sapand-āsā girah meñ bāñdh rakkhī hai sadā tū ne

safā-e-dil ko kyā ārā.ish-e-rañg-e-ta.alluq se

kaf-e-ā.īna par bāñdhī hai o nādāñ hinā tū ne

zamīñ kyā āsmāñ bhī terī kaj-bīnī pe rotā hai

ġhazab hai satr-e-qur.āñ ko chalīpā kar diyā tū ne

zabāñ se gar kiyā tauhīd kā daavā to kyā hāsil

banāyā hai but-e-pindār ko apnā ḳhudā tū ne

kueñ meñ tū ne yūsuf ko jo dekhā bhī to kyā dekhā

are ġhāfil jo mutlaq thā muqayyad kar diyā tū ne

havas bālā-e-mimbar hai tujhe rañgīñ-bayānī kī

nasīhat bhī tirī sūrat hai ik afsāna-ḳhvānī kī

dikhā vo husn-e-ālam-soz apnī chashm-e-pur-nam ko

jo taḌpātā hai parvāne ko rulvātā hai shabnam ko

zarā nazzāra hī ai bul-havas maqsad nahīñ us kā

banāyā hai kisī ne kuchh samajh kar chashm-e-ādam ko

agar dekhā bhī us ne saare aalam ko to kyā dekhā

nazar aa.ī na kuchh apnī haqīqat jaam se jam ko

shajar hai firqa-ārā.ī ta.assub hai samar us kā

ye vo phal hai ki jannat se nikalvātā hai aadam ko

na uTThā jazba-e-ḳhurshīd se ik barg-e-gul tak bhī

ye rif.at kī tamannā hai ki le uḌtī hai shabnam ko

phirā karte nahīñ majrūh-e-ulfat fikr-e-darmāñ meñ

ye zaḳhmī aap kar lete haiñ paidā apne marham ko

mohabbat ke sharar se dil sarāpā nuur hotā hai

zarā se biij se paidā riyāz-e-tūr hotā hai

davā har dukh kī hai majrūh-e-teġh-e-ārzū rahnā

ilāj-e-zaḳhm hai āzād-e-ehsān-e-rafū rahnā

sharāb-e-be-ḳhudī se tā-falak parvāz hai merī

shikast-e-rañg se sīkhā hai maiñ ne ban ke bū rahnā

thame kyā dīda-e-giryāñ vatan kī nauha-ḳhvānī meñ

ibādat chashm-e-shā.ir kī hai har dam bā-vazū rahnā

banā.eñ kyā samajh kar shāḳh-e-gul par āshiyāñ apnā

chaman meñ aah kyā rahnā jo ho be-ābrū rahnā

jo tū samjhe to āzādī hai poshīda mohabbat meñ

ġhulāmī hai asīr-e-imtiyāz-e-mā-o-tū rahnā

ye istiġhnā hai paanī meñ nigūñ rakhtā hai sāġhar ko

tujhe bhī chāhiye misl-e-habāb-e-ābjū rahnā

na rah apnoñ se be-parvā isī meñ ḳhair hai terī

agar manzūr hai duniyā meñ o begāna-ḳhū rahnā

sharāb-e-rūh-parvar hai mohabbat nau-e-insāñ kī

sikhāyā is ne mujh ko mast be-jām-o-subū rahnā

mohabbat hī se paa.ī hai shifā bīmār qaumoñ ne

kiyā hai apne baḳht-e-ḳhufta ko bedār qaumoñ ne

bayābān-e-mohabbat dasht-e-ġhurbat bhī vatan bhī hai

ye vīrāna qafas bhī āshiyāna bhī chaman bhī hai

mohabbat hī vo manzil hai ki manzil bhī hai sahrā bhī

jaras bhī kārvāñ bhī rāhbar bhī rāhzan bhī hai

maraz kahte haiñ sab is ko ye hai lekin maraz aisā

chhupā jis meñ ilāj-e-gardish-e-charḳh-e-kuhan bhī hai

jalānā dil kā hai goyā sarāpā nuur ho jaanā

ye parvāna jo sozāñ ho to sham-e-anjuman bhī hai

vahī ik husn hai lekin nazar aatā hai har shai meñ

ye shīrīñ bhī hai goyā be-sutūñ bhī kohkan bhī hai

ujāḌā hai tamīz-e-millat-o-ā.īñ ne qaumoñ ko

mire ahl-e-vatan ke dil meñ kuchh fikr-e-vatan bhī hai

sukūt-āmoz tūl-e-dāstān-e-dard hai varna

zabāñ bhī hai hamāre muñh meñ aur tāb-e-suḳhan bhī hai

namī-gardīd ko tah rishta-e-ma.anī rihā kardam

hikāyat buud be-pāyāñ ba-ḳhāmoshī adā kardam

Poets
  • ADIL MANSURI116 Post(s)
  • AHMAD FARAZ337 Post(s)
  • Ahmad Nadeem Qasmi82 Post(s)
  • Allama Iqbal494 Post(s)
  • Mirza ghalib52 Post(s)
English Poets
  • Emily Angel31 Post(s)
  • Emily Dean13 Post(s)
  • Emily Huntington Miller7 Post(s)
  • Emily Knight13 Post(s)
  • Emily Liang26 Post(s)
  • Emily Wilson17 Post(s)
  • Robert Frost191 Post(s)
  • Rumi148 Post(s)
  • William Shakespeare376 Post(s)
On Trend

Popular Poetry

tazmin

ġham tumhārā thā zindagī goyā tum ko khoyā use nahīñ khoyā fart-e-girya se jī na halkā ho bas yahī soch kar nahīñ royā ashk to ashk haiñ sharāb se bhī maiñ ne ye dāġh-e-dil nahīñ dhoyā maiñ vo kisht-e-nashāt kyoñ kāTūñ jis ko maiñ ne kabhī nahīñ boyā aabla aabla thī jaañ phir bhī bār-e-hastī

safed chhaDiyan

janam kā andhā jo soch aur sach ke rāstoñ par kabhī kabhī koī ḳhvāb dekhe to ḳhvāb meñ bhī azaab dekhe ye shāhrāh-e-hayat jis par hazār-hā qāfile ravāñ haiñ sabhī kī āñkheñ har ek kā dil sabhī ke raste sabhī kī manzil isī hujūm-e-kashāñ-kashāñ meñ tamām chehroñ kī dāstāñ meñ na naam merā na zaat

diwar-e-girya

vo kaisā shobada-gar thā jo masnūī sitāroñ aur naqlī sūrajoñ kī ik jhalak dikhlā ke mere saada dil logoñ kī āñkhoñ ke diye hoñToñ ke jugnū le gayā aur ab ye aalam hai ki mere shahr kā har ik makāñ ik ġhaar kī mānind mahrūm-e-navā hai aur hañstā boltā har shaḳhs ik dīvār-e-girya hai

mujassama

ai siyah-fām hasīna tirā uryāñ paikar kitnī pathrā.ī huī āñkhoñ meñ ġhaltīda hai jaane kis daur-e-alama-nāk se le kar ab tak tū kaḌe vaqt ke zindānoñ meñ ḳhvābīda hai tere sab rañg hayūle ke ye be-jān nuqūsh jaise marbūt ḳhayālāt ke tāne-bāne ye tirī sāñvlī rañgat ye pareshān ḳhutūt bārhā jaise miTāyā ho inheñ duniyā

%d bloggers like this: