ai dil un āñkhoñ par na jā
jin meñ vafūr-e-rañj se
kuchh der ko tere liye
aañsū agar lahrā ga.e
ye chand lamhoñ kī chamak
jo tujh ko pāgal kar ga.ī
in jugnuoñ ke nuur se
chamkī hai kab vo zindagī
jis ke muqaddar meñ rahī
sub.h-e-talab se tīrgī
kis soch meñ gum-sum hai tū
ai be-ḳhabar nādāñ na ban
terī fasurda ruuh ko
chāhat ke kāñToñ kī talab
aur us ke dāman meñ faqat
hamdardiyoñ ke phuul haiñ